વલસાડના શ્રી ભીડભંજન ટ્રસ્ટ દ્વારા નિઃશુલ્ક ટિફિન સેવાના ૨૬ વર્ષ પૂરા કર્યા: ૦૧/૦૫/૨૦૦૦ ના રોજ કરવામાં આવ્યો હતો અને આજદિન સુધી હજારો લોકોને આ સેવાથી લાભ મળ્યો છે.

ગુજરાત એલર્ટ | વલસાડ
વલસાડ શ્રી ભીડભંજન સેવા ચેરિટેબલ ટ્રસ્ટ દ્વારા નિઃશુલ્ક ટિફિન સેવા શરૂ કર્યાના ૨૬ વર્ષ પૂર્ણ થતા વિશેષ ઉજવણી કરવામાં આવી હતી. આ ટ્રસ્ટ દ્વારા છેલ્લા અનેક વર્ષોથી જરૂરિયાતમંદ લોકો સુધી નિઃશુલ્ક ભોજન પહોંચાડવાની સેવા સતત અને નિષ્ઠાપૂર્વક આપવામાં આવી રહી છે. ટ્રસ્ટના સભ્યો અને સેવાભાવી લોકોના સહકારથી આ સેવા આજદિન સુધી સફળતાપૂર્વક આગળ વધી રહી છે, જેના કારણે અનેક ગરીબ અને નિરાધાર લોકોને રોજિંદું ભોજન સરળતાથી પ્રાપ્ત થાય છે.
ટ્રસ્ટ દ્વારા આ સેવા નો પ્રારંભ ૦૧/૦૫/૨૦૦૦ ના રોજ કરવામાં આવ્યો હતો અને આજદિન સુધી હજારો લોકોને આ સેવાથી લાભ મળ્યો છે. ૨૬ વર્ષ પૂર્ણ થવાના અવસરે ભીડભંજન મહાદેવ મંદિરે વિશેષ પૂજા અને યજ્ઞનું આયોજન કરવામાં આવ્યું હતું, જેમાં મોટી સંખ્યામાં ભક્તો અને ટ્રસ્ટના કાર્યકરો ઉપસ્થિત રહ્યા હતા. આ પ્રસંગે દાન, સેવા અને માનવતા જેવા મૂલ્યોને પ્રોત્સાહન આપવાનો સંદેશ આપવામાં આવ્યો હતો.
આ સેવા માત્ર ભોજન પૂરું પાડવા પૂરતી મર્યાદિત નથી, પરંતુ તે માનવતા અને કરુણાનો એક ઉત્તમ ઉદાહરણ છે, જે શરીર સાથે આત્માને પણ તૃપ્તિ આપે છે. ભૂખ્યા લોકોને અન્ન આપવું એ સૌથી મોટું પુણ્ય માનવામાં આવે છે અને આ ટ્રસ્ટ દ્વારા આ કાર્ય સતત કરવામાં આવી રહ્યું છે. સમાજના જરૂરિયાતમંદ લોકો માટે આ સેવા આશીર્વાદ સમાન બની છે.
આજે પણ અનેક લોકો સુધી ટિફિન પહોંચાડવામાં આવે છે અને કેટલાક કિસ્સામાં હોસ્પિટલમાં દાખલ દર્દીઓ અથવા તેમના પરિવારજનો માટે પણ ખાસ વ્યવસ્થા કરવામાં આવે છે. સવારે નિશ્ચિત સમયથી ફોન પર ઓર્ડર પ્રાપ્ત કરી, જરૂર મુજબ ટિફિન પહોંચાડવામાં આવે છે જેથી કોઈ પણ વ્યક્તિ ભૂખ્યો ન રહે. ટ્રસ્ટ દ્વારા ગરીબ, નિરાધાર અને જરૂરિયાતમંદ લોકોને ધ્યાનમાં રાખીને આ સેવા નિઃશુલ્ક આપવામાં આવે છે, જેના કારણે સમાજમાં માનવતાની ભાવના વધુ મજબૂત બની રહી છે.