કિસાન ઉત્સવ દિવસ અને રાષ્ટ્રીય એકતા દિવસની ઉજવણીને અનુલક્ષીને પ્રભારી મંત્રી નરેશભાઈ પટેલે ધરમપુર ખાતે બેઠક કરી: ધરમપુર, કપરાડા અને નાનાપોંઢા તાલુકામાં યોજાનારા કાર્યક્રમની સમીક્ષા કરી

ગુજરાત એલર્ટ | વલસાડ
૩૦ ઓકટોબર કિસાન ઉત્સવ દિવસ અને ૩૧ ઓક્ટોબર રાષ્ટ્રીય એકતા દિવસ ઉજવણીને અનુલક્ષીને વલસાડ જિલ્લાના પ્રભારી મંત્રી અને આદિજાતિ વિકાસ મંત્રી નરેશભાઈ પટેલે ધરમપુર સેવાસદન ખાતે ધરમપુર, કપરાડા અને નાનાપોંઢા તાલુકાના ચૂંટાયેલી પાંખના પદાધિકારીઓ અને અધિકારીઓ સાથે વિસ્તૃત ચર્ચાઓ કરી હતી.
મંત્રીએ નાનાપોંઢાના ધારાસભ્ય જીતુભાઈ ચૌધરી અને ધરમપુરનાં ધારાસભ્ય અરવિંદભાઇ પટેલની ઉપસ્થિતિમાં જણાવ્યું હતું કે દેશના વડાપ્રધાનશ્રી દેશના જનજનની ચિંતા કરે છે. રાષ્ટ્રની એકતા જળવાઈ રહે અને સમસ્ત સમાજનો ઉત્કર્ષ થાય એ આશય સાથે વિવિધ કાર્યક્રમોનું આયોજન થયું છે.
તેમણે તા.૩૦ મી કિસાન ઉત્સવ દિવસ અને તા.૩૧ મી રાષ્ટ્રીય એકતા દિવસ ઉજવણી કાર્યક્રમમાં સૌને ભાગીદાર બનાવવા અપીલ કરી હતી.
૩૦ મી એ કિસાન ઉત્સવ દિવસ ઉજવણી જીલ્લા પંચાયત બેઠક દીઠ બે કાર્યક્રમો થશે.જ્યારે ૩૧ મીએ રાષ્ટ્રીય એકતા દિવસ ઉજવણી દરેક ગામોમાં થશે.
કલેક્ટર નિતિન સાંગવાને ત્રણેય તાલુકામાં યોજાનારા કાર્યક્રમની તૈયારીઓ અંગે જાણકારી આપી હતી.
બેઠકમાં જીલ્લા ખેતીવાડી અધિકારીએ અરુણ ગરાસીએ કિસાન ઉત્સવ દિવસ ઉજવણી અંગેની જાણકારી આપી હતી.