ગુજરાત એલર્ટ | ધરમપુર
ભગવાન બિરસા મુંડાજીના અદમ્ય શૌર્ય, સંઘર્ષ અને જનજાતીય ગૌરવને સમર્પિત જનજાતીય ગૌરવ પરિવહન અંતર્ગત ગુજરાત સરકારશ્રી દ્વારા ધરમપુર એસ.ટી. ડેપોને ફાળવવામાં આવેલી કુલ 4 મિનિબસોનું આજે ધરમપુર ખાતે લોકાર્પણ કરવામાં આવ્યું હતું. ધરમપુરના ધારાસભ્ય તથા ગુજરાત પ્રદેશ ભાજપના ઉપાધ્યક્ષ શ્રી અરવિંદભાઈ પટેલના હસ્તે આ મિનિબસોનું લોકાર્પણ કરવામાં આવ્યું હતું.
લોકાર્પણ બાદ આ સેવાનો પ્રત્યક્ષ અનુભવ કરવા માટે ધારાસભ્ય શ્રી અરવિંદભાઈ પટેલ સાથે ભારતીય જનતા પાર્ટીના હોદ્દેદારો તથા એસ.ટી. ડેપોના અધિકારીશ્રીઓએ મિનિબસમાં બેસીને વિદ્યાર્થીઓ માટે નિર્ધારિત રૂટ પર આસુરા શાળા સુધી પ્રવાસ કર્યો હતો. આ પ્રવાસ દરમિયાન બસની સુવિધાઓ, માર્ગની પરિસ્થિતિ તેમજ વિદ્યાર્થીઓને મળનારી પરિવહન સેવાનો પણ પ્રત્યક્ષ નિરીક્ષણ કરવામાં આવ્યું હતું. આ પ્રસંગે વિદ્યાર્થીઓ માટે શરૂ કરવામાં આવી રહેલી આ સેવા માત્ર પરિવહન સુવિધા નહીં પરંતુ તેમના શિક્ષણ સુધી પહોંચને વધુ સરળ બનાવનાર મહત્વપૂર્ણ માધ્યમ બની રહેશે તેવી લાગણી વ્યક્ત કરવામાં આવી હતી.
જનજાતીય વિસ્તારોમાં પરિવહનની સુવિધાને વધુ સુદૃઢ બનાવવા તથા ખાસ કરીને અંતરિયાળ અને ગ્રામ્ય વિસ્તારોમાં અભ્યાસ કરતા વિદ્યાર્થીઓને સરળ, સુલભ અને સુરક્ષિત પરિવહન સેવા ઉપલબ્ધ કરાવવાના હેતુથી આ મિનિબસો ફાળવવામાં આવી છે. આ મિનિબસો વિદ્યાર્થીઓની જરૂરિયાતને ધ્યાનમાં રાખીને વિશેષ રૂટ પર સંચાલિત કરવામાં આવશે, જેના પરિણામે અનેક વિદ્યાર્થીઓને નિયમિત શાળા-કોલેજ સુધી પહોંચવામાં વધુ સરળતા રહેશે.
ધરમપુર તાલુકો ભૌગોલિક રીતે વિશાળ અને અનેક અંતરિયાળ તથા ડુંગરાળ વિસ્તારો ધરાવતો તાલુકો છે. આવા વિસ્તારોમાં રહેતા વિદ્યાર્થીઓ માટે સમયસર અને સુવિધાયુક્ત પરિવહન સેવા ખૂબ જ મહત્વપૂર્ણ બની રહે છે. વિદ્યાર્થીઓને લાંબું અંતર પગપાળા કાપવું ન પડે, અભ્યાસમાં પરિવહનની અડચણ ન બને તથા શિક્ષણ સાથે વધુ સારી રીતે જોડાઈ શકે તે દિશામાં આ મિનિબસો મહત્વપૂર્ણ સાબિત થશે.
આ પ્રસંગે ધારાસભ્ય શ્રી અરવિંદભાઈ પટેલ એ જણાવ્યું હતું કે, શિક્ષણ સુધી પહોંચ માત્ર શાળાની ઉપલબ્ધતા પૂરતી મર્યાદિત નથી, પરંતુ વિદ્યાર્થીઓને શાળા સુધી પહોંચવા માટેની સુવિધા પણ એટલી જ મહત્વપૂર્ણ છે. ધરમપુર જેવા જનજાતીય અને અંતરિયાળ વિસ્તારના વિદ્યાર્થીઓને પરિવહનની સુવિધા મળી રહે તે માટે સરકારશ્રી દ્વારા કરવામાં આવેલી આ ફાળવણી ખૂબ જ મહત્વપૂર્ણ છે.
તેમણે વધુમાં જણાવ્યું હતું કે, જનજાતીય સમાજના સર્વાંગી વિકાસ માટે શિક્ષણ, આરોગ્ય, રોજગાર અને પરિવહન સહિતના ક્ષેત્રોમાં સતત સુવિધાઓનો વિસ્તાર કરવામાં આવી રહ્યો છે. ભગવાન બિરસા મુંડાજીના સંઘર્ષ અને જનજાતીય ગૌરવની ભાવનાને કેન્દ્રસ્થાને રાખીને જનજાતીય વિસ્તારોના વિકાસ માટે સરકારશ્રી દ્વારા વિવિધ પહેલ હાથ ધરવામાં આવી રહી છે.
આ 4 મિનિબસોના સંચાલનથી ધરમપુર તાલુકાના અનેક ગામડાઓ અને અંતરિયાળ વિસ્તારોમાંથી અભ્યાસ માટે આવનારા વિદ્યાર્થીઓને સીધો લાભ મળશે. ખાસ કરીને નિયમિત શાળાએ જતા વિદ્યાર્થીઓ માટે સુવ્યવસ્થિત અને નિર્ધારિત રૂટ પર પરિવહન સેવા ઉપલબ્ધ થવાથી તેમની મુસાફરી વધુ સરળ બનશે.
વધુમાં જણાવ્યું હતું કે, સરકારશ્રીની વિકાસલક્ષી પહેલોનો સાચો લાભ અંતરિયાળ અને જરૂરિયાતમંદ લોકો સુધી પહોંચે તે જ સમાવેશી વિકાસ અને વિકસિત ભારતના સંકલ્પની સાચી દિશા છે. જનજાતીય વિસ્તારોમાં માળખાકીય સુવિધાઓના વિકાસ સાથે શિક્ષણ અને પરિવહન ક્ષેત્રે થઈ રહેલા આ પ્રકારના પ્રયાસો આગામી સમયમાં વિસ્તારના સર્વાંગી વિકાસને વધુ ગતિ આપશે.
ભગવાન બિરસા મુંડાજીને સમર્પિત જનજાતીય ગૌરવ પરિવહન અંતર્ગત શરૂ થયેલી આ નવી સેવા ધરમપુરના વિદ્યાર્થીઓ માટે સુવિધા, સુરક્ષા અને શિક્ષણની વધુ સારી તકનું માધ્યમ બનશે. આ મિનિબસોના નિયમિત સંચાલનથી વિદ્યાર્થીઓની રોજિંદી મુસાફરી સરળ બનવાની સાથે તેમના શૈક્ષણિક ભવિષ્યને પણ વધુ મજબૂત આધાર મળશે.
ધરમપુરના જનજાતીય અને અંતરિયાળ વિસ્તારોના વિકાસ માટે સરકારશ્રીની પ્રતિબદ્ધતાના ભાગરૂપે શરૂ થયેલી આ પરિવહન સેવા ‘સૌનો સાથ, સૌનો વિકાસ, સૌનો વિશ્વાસ, સૌનો પ્રયાસ’ના સંકલ્પને સાકાર કરવાની દિશામાં એક મહત્વપૂર્ણ પગલું બની રહેશે.
